"Хоһооҥҥо хоһуллар, ырыаҕа ылланар мааны Майабыт"

Майаны уруйдуур-айхаллыыр алыптаах хоһооннор, ылбаҕай ырыалар

Сайдар Майабыт / [хомуйан оҥордо А. П. Федорова] – Дьокуускай : Сайдам, 2017. – 496 с.

Николай Иванович Степанов – Ноорой

Майа туһунан тойук

Бэстэригим ыйдара бэһистиирин саҕана,

Сүүрүк-сүүрүк аппыт сүһүөҕүнэн эриллэр,

Дьоруо-дьоруо аппыт тобугунан охсуллар,

Аҕыс салаалаах ача күөх отунан

Айаннатан иһэммин:

Аныгы Майабыт,

Алгыстаах Майабыт

Кэлэр-барар киһини

Көтөр аал күүһүнэн көтөҕөр эбитин,

Айанныыр дьоннору аптамабыыл көлөнөн

Маанылаахтыыр эбитин

Сөҕө көрдүм, таптыы көрдүм.

Илин-кэлин өттүттэн араҕас маҥан халлааным

Саһарҕата оонньуур сардаҥатын анныгар

Саҥа тутуулар сандааран көһүннүлэр.

Бастатан туран, балыыһа дьиэни баһыыбалыы көрдүм.

Барабыык массыына бастаан туруоҕуттан,

Билиҥҥи кэмҥэ баһаам үлүгэр

Уоту-күүһү биэрэр улахан станциялар

Уһун турбаларынан уһуургуу турбуттар,

Хара турбаларынан хаһыыран ылбыттар.

Мастарыскыай дьиэҕэр Маппый уус кирбийбит,

Уһанар дьиэҕэр Уйбаан уол уһаммыт.

Майа барахсан тигинии-таҕыныы, дирбийэ-дарбыйа

Коммунизм суолугар хотуулаахтык айаннаан,

Хоһооҥҥун, ырыаҕын хомустарын тыаһынан

Хоҥкуначчы туойа, туругура-туругура

Тураҕын дии ахан!

Елена Атласова – Кыһа кыыма

Саҥа Майа

Ахтар саныыр алааһым

Мааны Майам барахсан,

Саатыыр саҥа үйөҕэ

Саҥардыллан сайдыаҕа.

Кэрискэлиир кэмнэргэ

Кэрэ тутуу кэккэлиэ,

Аныгылыы айыллан

Саҥа алаас арыллыа.

Манна сэмэй майгылаах,

Ыраас ыра санаалаах,

Дьоһун дьикти дьоҕурдаах

Дьоллоох киһи олоруо.

Сайдар олох туһугар

Саргы-дьаалы салаллыа,

Кэлэр кэскил биһигэ,

Саҥа Майа сандаарыа.

Марфа Ноговицына - Эйээнэ

Майам миэнэ аатырыаҥ

Үөрэх-билии үктэллээх,

Көхтөөх үлэ күүрээннээх,

Ырыа-тойук аргыстаах.

Сайдам талыы ыччаттаах,

Майам миэнэ кэскиллээх,

Майам миэнэ сайдыылаах.

Кэрэчээн сибэккилэриҥ

Тэлгэһэҕин симииллэр,

Көхтөөх бигэ ыалларыҥ

Түөлбэҕин аатырдаллар,

Майам миэнэ киэркэйэр,

Майам миэнэ сураҕырар

Үтүө кэрэ мөссүөнүҥ

Үйэлэри уҥуордаан,

Үгүс үлэһит дьоҥҥунан

Үүнэ-үрдүү туруоҕуҥ,

Майам миэнэ тупсан иһиэҥ!

Майам миэнэ сайда туруоҥ!

Елена Прокопьева

Майа ахтылҕана

Мин оҕо эрдэхтэн билэбин

Майа диэн мааны сир эбитин,

“Майаҕа бардыбыт” дииллэрин,

Майаттан ас-таҥас кэлэрин.

Массыына куусабар хатаастан,

Аҕабар түһэҕэр олорсон,

Аан маҥнай Майаҕа кэлбиппин

Адьас бу харахпар көрөбүн.

Арыы тыа оччоҕо баар этэ,

Аргыыйдык суугунаан ылбыта,

Баараҕай лабаатын хамсатан,

“Бирибиэт” диэн этэр курдуга...

Комсомол ыйыытын толорон,

Комсомол төлөнүн уматан,

Мин кэлин үлэлии кэлбитим,

Мин манна буспутум-хаппытым.

Комсомол уолаттар, кыргыттар

Майаҕа эйэлээх этибит,

Күүрээннээх үлэлээх ыччаттар

“Майабыт биһиэнэ” дэһэрбит.

Майабыт сайдарын туһугар,

Мэҥэбит кэскилин иннигэр

Көхтөөхтүк үлэлээн ааспыппыт,

Кэскилбит аартыгын аспыппыт.

Майабыт күннэтэ тупсаҕын,

Мааны таас дьиэлэргин дьэргэтэн,

Майабыт, балысхан сайдыыгын

Махталлаах бар-дьоҥҥор аныыгын!

Светлана Иванова

Маанылыыр Майабыт

Сайа тыынар салгыннаах,

Сайдар-үүнэр ыччаттаах,

Үлэһит үтүө дьоннордоох

Үөрэх-билии аргыстаах.

Маанылыыр Майабыт биһиэнэ

Тапталлаах Майабыт Мэҥэҕэ,

Ыраата бардахха ахтабыт

Ыҥырар, угуйар алыбын.

Мэҥэбит тэбэр сүрэҕэ

Мээнэҕэ эппэппит бадаҕа,

Ырыаҕа ыллааммыт туойабыт

Хоһооҥҥо хоһуйа холуубут.

Төрөөбүт дойдубут Майабыт

Түөлбэлээн олорор биһикпит,

Киэҥ аартыгын суолугар

Кэскиллээх олоҕо тыргыллар.

Үгүс ситиһии кынаттанан

Үрдүктэн үрдүккэ дабайан,

Сахалыы саҥалаах сатараан

Маанылыыр Майабыт сайыннынй !

Анисия Скрябина

Мааны Майабыт

Унаар киэҥ киэлитэ,

Умнуллубат күндүтэ,

Умсулҕаннаах кэскилэ,

Уйгубутун түстүүрэ.

Аалай уоппут оттуллар,

Алаһа дьиэ тутуллар.

Оҕо-уруу чугдаарар,

Олох устар Майаҕа.

Дьоллоох дьиэ кэргэн уйата,

Дьоһун үлэһит бастыҥа.

Дьоҕурдаах эдэр ыччата.

Дойдубут Майабыт баайа.

Киэһээҥҥи кэмҥэ мичийэр,

Күлүмнүү үөрэ көрсөр.

Күндүттэн күндүгүн эрэ,

Кэрэ-мааны Майабыт.

Чулуу дьонноруҥ үөрэҕэ

Чаҕылыйа турдун үйэҕэ.

Чөл олоҕу тута-айа,

Чэлгийэ сайыннын Майа!

Надежда Андросова – Мэҥэ кыыһа Алгыстаана

Ырыаҕа ылламмыт,

Хоһооҥҥо холбоммут

Хайалартан үрдүк дэппит

Мэҥэ улууһун

Маанылаах дойдута

Мин Майам!

Ойор күннээх

Оҕо сааһым биһигэ

Күннэтэ тупса, киэкэйэ,

Чэчирии, сайда тур,

Ахтылҕаннаах мин Майам!

Дойдум мүөттээх

Салгынынан

Сүрэхпин сылаанньыта

Сайа тыынаммын

Олохпор кынаттанабын

Тапталлаах мин Майам!

Лилия Санникова

Майа

Майа кэҥиир, улаатар,

Олох тупсар, киэркэйэр.

Үлэ, үөрүү кыттыһар,

Ырыа-тойук дьиэрэйэр.

Саҥа сырдык дьиэлэргэр

Күн күлүмэ кутуллар,

Арыы тыаҕар, алааскар

Элбэх тутуу дьэндэйэр.

Майа, Майа дойдубут

Ахтар, таптыыр түөлбэбит,

Үтүө-мааны дьоннорбут,

Дьоллоох эдэр ыччаппыт.

Майа таптал уйата,

Эдэр ыччат төлкөтө,

Оҕо аймах үөрүүтэ,

Үүнэр-сайдар кэскилэ.

Сардаана Стручкова

Майабар

Сааскы күн сарыала

Кууста дии Майабын,

Күн чаҕылхай уота

Илгийдэ дии сылааһынан.

Сахалыы ылбаҕай ырыалаах,

Сып-сырдык санаалаах

Алгыс ыралаах дойдубут

Арчылыыр, алгыыр аналлаах.

Үтүөкэн үлэһит дьоннордоох,

Мындыр уус, талба талааннаах

Бойобуой уордьаннаах буойуттар

Бааллар эбээт дойдубар.

Ытык-мааны сэргэлээх

Ураһалаахха дьиэрэйэр оһуохай.

Аан дойдуга аатырар

Кырдалга кыталыктар үҥкүүлэрэ.

Атын дойду кыыһа кэлбитим

Дьылҕа-хаан ыйыытынан.

Бу сиргэ анаатым олохпун

Үйэлээх тапталга иҥэрэн.

Таптыыбын мин Майабын

Төгүрүк алааска майгынныыр,

Чэбдик сайаҕас салгыннаах

Сайдам саргылаах дойдубун.

Айталина Кошунова

Биһиги Майабыт

Алааспыт чэбдик көй салгынын

Ийэбит үүтүнүүн испиппит.

Күн сирин кэрэтин аан бастаан

Майаҕа сыаналыыр буолбуппут.

Дойдубут сайдыытын түстээммит,

Күүрээннээх үлэни билбиппит.

Дьоннору кытары алтыһан

Бу сиргэ дьоллоохпут дэммиппит.

Хаҕыс тыал баалыгар бэриммэт

Үлэһит дьоннордоох буолуохха,

Майабыт инники дьылҕатын

Эрэллээх илиигэ биэриэххэ.

Майабыт байылыат олоҕо

Куруутун чэлгийэ туруохтун.

Хас биирдии ыал ньээкэ уйата

Оҕо саас дьолунан туолуохтун.

Бу мантан куорсуну анньынан

Үрдүккэ дьулуһар ыччаттар.

Ханнык да кый ыраах дойдуттан

Майаҕа эргиллэ турдуннар!

Марелла Баишева – Сайдыына

Үүнэр-сайдар Майабыт

Уонунан тыһыынча дьон-сэргэ

Уутуйан-улуутуйан олохсуйбут,

Мааны Майа дэтиэххин дэтэҕин!

Сыллата тупсаҕын, киэркэйэҕин,

Норуот сүрэҕин тутаҕын.

Таас дьиэлэр тэллэй курдук үүнэллэр,

Аспаал уулуссаллар сиэркилэлии килбэйэллэр

Болуосаттар, тэлгэһэлэр күөҕүнэн суугунууллар,

Олорорго, үлэлииргэ үчүгэйиэн Майабыт!

Ходулов тыйаатыр сыанатыгар

Талаан арааһа арыллар.

Ырыа-үҥкүү аргыстаах

Ойуу-дьарҕаа оһуордаах

Ахсаана биллибэт араас элбэх

Бэлэх, түмсүү эгэлгэтэ

Күннэтэ үксүү тураллар.

Үөрэх-билии кыһалара,

Муусука биһигэ, “Кыталык” киинэ,

Кыраайы үөрэтэр түмэл.

“Манчаары” успуор саалата

Ыччаты олох киэҥ аартыгар угуйар.

Артыыстар, суруйааччылар, мелодистар,

Успуор, норуот маастардара, учуонайдар

Хотоҕостуу субулла хойдоллор.

Аан дойду кэтит уораҕайыгар

Төрөөбүт дойдуларын суон сураҕырдаллар,

Арассыыйаны албан аатырдаллар.

“Мэҥэлэр – хайа үрдүгэр!” дэтэллэр.

Майаларын дорҕоонноохтук ааттаталлар.

Эркээйилэр “Эркээйи”,

Айар куттаах “Таммахтар”.

Дьолу түстүүр “Дьол түһүлгэтэ”,

Сырдыгынан сыдьаайар “Сырдык Айыылар”.

Бастыҥ көхтөөх түөлбэлэр –

Бары манна бааллар.

Хотой Айыы, Одун Хаан

Биир сүбэнэн айаллар,

Айымньылаах олохтоохтор

Тахсыылаахтык үлэлииллэр.

Көлүөнэлэр көхтөөхтүк,

Сарсыҥҥыны уһансаллар.

Уоттаах түүҥҥү Майаҕа

Эдэр ыччат күүлэйдиир,

Олохпут утума салҕанар

Кэлэр кэскилэ түстэнэр.

Олорорго, үлэлииргэ

Үчүгэйиэн, Майабыт!

Евдокия Попова – Айыына

Дьол уйата – Майабыт

Саҕахтары сэгэтэн

Сандаарыйа дьэргэйэн

Күммүт уота мичийэр,

Күлүмүрдүү көччүйэр.

Үлэ күөстүү оргуйар,

Эдэр дьону үгүйар.

Үөрүү-көтүү үрдүүр,

Ыччаттары көҕүлүүр.

Дойдум киинэ – Майам

Санаам сырдык иэйиитэ,

Сайдар-тупсар киэҥ Майам

Дьол-соргу уйата.

Бастыҥ маяк дьоннордоох

Сарсыҥҥыга эрэллээх,

Сайдар-үүнэр кэскиллээх,

Баараҕай бастыҥ тутуулаах.

Дьоһун дойду Майабыт

Үүнэ турууй өрүүтүн.

Дьол кыымнарын саҕаҥҥын

Үйэлэри уҥуордаан!

Инна Николаева

Майаҕа

Саргылаах сарсыарда

дойдубар Майаҕа

Силбиктэн сэмсэлээн

айылҕам уһуктар,

Сиккиэр тыал сытыыта

илбийэр кууланы,

Сыһыыга көччүйэ сылгылар

кистииллэр.

Сайдыылаах субуллар үтүмэн

суолунан

Сайаҕас майгылаах киэн

туттар дьонунан

Сандаарар күннэтэ

кыымынан кытыаста,

Саһарҕа күлүмнээх төрөөбүт

мин Майам.

Саҥалыы сэдэхтик дьэндэһэр

таас дьиэлэр

Сорсуннаах күннэрбэр эрэлгэ

сирдииллэр,

Сандаарар тыйаатыр

кылбаарар киинигэр,

Сахалыы дуорааннаах олоҥхо

оонньонор.

Ситиһии кылааннаах

кэнчээри ыччаттар

Сүүрүктээх сүүрээни

хорсуннук хотоннор,

Сугулаан түмүгүн түмсүүнэн

барыллаан,

Сиэдэрэй симэххэ Майабын

симииллэр.

Сылтан сыл чэлгийэ, тупса тур

Майабыт

Суугунуур аартыктар

ааннарын арыйтаа,

Ситиилээх салама алгыстаах

бэлэхтээх,

Ситимнээх оһуохай тойугар

ыҥыраар.

Майаҕа саас кэллэ

Кылыйар үҥкүүлээх

таммахтар

Кырыыһам үрдүттэн

сүүрдүлэр,

Күлүмнэс күн кыыма

мичээрдээх

Саас кэллэ, саас кэллэ

Майаҕа.

Чоргуйар ырыалаах

чооруостар

Чэччийэн тырымныы

көттүлэр,

Чигдилээх хаардары

уулларан,

Саас кэллэ, саас кэллэ

Майаҕа.

Сыламҥа көҥүллүк көччүйэн

Сарыалы уруйдуур күөрэгэй,

Саҥа күн сылааһын бэлэхтээн

Саас кэллэ, саас кэллэ

Майаҕа.

Килбиэннээх төрөөбүт күнүгэр

Күлүмнүү киэркэйэр Майабыт,

Күндүтүк айхаллаан уруйдуох,

Күргүөмнээх Майабыт

күннэрин!

Розалия Анисимова – Талбаана

Мааны Майам

Таптыыр-ахтар, мэлдьи саныыр

Мааны Майам, күөх Майам.

Бүгүн төрөөбүт күнэ үүннэ

Дьоно-сэргэтэ мунньустан,

Уулуссаҕа таҕыста.

117 сыл устата

Үүнэ, сайда, чэчирии

Үлэ-үөрэх үөһүгэр

Күнүн аайы киэркэйэр.

Таас дьиэлэрэ дьэндэйэр

Күөх үүнээйинэн чэчириир.

Үлэһит чулуу дьонунан

Үтүө аата ааттанар.

Кыайыытынан, хотуутунан

Кынаттанан үүнэр, сайдар.

Тапталы, дьолу уруйдаан

Дьоһун ырыа дьиэрэйэр.

Саныыр ахтар Майам сирэ

Уһун үйэлэргэ кэхтибэккэ,

Өссө да үүнэ сайда

Мэҥэ хайа үрдүгэр

Мэлдьи үөһэ тахса тур.

Алгыс быһа сыаланнын!

Харысхал Татаринов

Майам барахсан

Айан суолунан аартыктанан,

Кэллим ахтылҕаннаах Майабар,

Киэҥ тупсаҕай бөһүөлэгим,

Улааппыккын, кэҥээбиккин.

Күлүмүрдүү сырдааҥҥын,

Угуйаҕын ыраахтан.

Алыптаах төрүт алааһым,

Таптыыр Майам барахсан.

Ыраас муораҕа тэҥнээх күөлүм,

Байанай алгыстаах уолаттарын

Көтөр кынаттааҕынан айхаллыыр

Көмүс хатырыктааҕынан күндүлүүр.

Хатыҥ чараҥ алааспар

Кылбаа маҥан кыталыктар,

Оһуор үҥкүү түһэрэннэр,

Таптаһар сүрэхтэри холбууллар.

Ыраас салгыҥҥынан уруйдаан,

Күүс-күдэх биэрэҕин.

Кэрэ көстүүгүнэн ойуулаан,

Үтүмэн дьону түмэҕин.

Үрдүккэ талаһа дайаҥҥын,

Улуу ааттары таһааран,

Аан дойдуга ааттанаҕын,

Таптыыр Майам барахсан.

Ырыаҕа ылланар Майабыт

Аныгы Майа (М. Данилова тыла уонна мелодията)

Үйэлэргэ Мэҥэ сиригэр

Үтүө ааттара биллибиттэр

Манчаары уонна герой Сүөдэр

Манна төрөөн-үөскээн ааспыттар.

Аныгы сайдыылаах Майаҕа

Айыллан үөскээбит ыччаттар

Ача күөх сирэмҥэр мустаммыт

Алгыстаах ырыаны ыллыыбыт.

Майаҕа улууспут киинигэр

Мааны таас тутуубут дьэндэйэр.

Манна дьэ эһиэкэй эйээрэр,

Эйэ-дьол, түһүлгэ түстэнэр.

Аныгы сайдыылаах Майаҕа

Айыллан үөскээбит ыччаттар

Ача күөх сирэмҥэр мустаммыт

Алгыстаах ырыаны ыллыыбыт.

Күн аайы Майабыт киэргэниэҥ

Күөҕүнэн уулуссаҥ чэлгийиэ,

Асфальт таас суолунан тэлгэниэ

Аан дойду ырыата ылланыа.

Аныгы сайдыылаах Майаҕа

Айыллан үөскээбит ыччаттар

Ача күөх сирэмҥэр мустаммыт

Алгыстаах ырыаны ыллыыбыт.

Бу сэргэх киэһэҕэ (И. Ксенофонтов тыллара, К. Рожина мелодията)

Киирэр күн килбиэннээх сарыалын

Саһарҕа нуктуурдуу түһэрэн,

Киэҥ Майам киэһээҥҥи халлаанын сырдатта,

Мичээрин бэлэхтээн

Бу сэргэх киэһэҕэ үөһээттэн

Майаны одуулуур кэрэтиэн.

Уйгулаах олохпут үөһүгэр

Угуйа турара дьиктитиэн

Күөх туман аларга налыйан

Күөл үрдүн үллүйэн наскыйда.

Сөп-сөрүүн сиккиэр тыал илгийэн

Сүрэхпин үөрүүнэн толордо.

Күнүскү үлэттэн дуоһуйан

Көй салгын нусхайа иһийдэ.

Эйээрэр музыка долгуна

Эдэрдэр дьоллорун хоһуйда.

Майа кыыһа (И. Сосин тыллара, И. Аргунов мелодията)

Алаас сирим хайҕала

Аймах дьонум таптала.

Аман өһүм барҕата,

Алгыс тылым саргыта,

Арылыйар кустугум.

Аалай сырдык сарыала -

Майа кыыһа арылхай,

Майа кыыһа чаҕылхай.

Көхтөөх үлэ үөрүүтэ,

Көрсөр, күүтэр биэбэйэ,

Күрсүө, сэмэй көрүүтэ

Күҥҥэ-ыйга тэҥнэһэр,

Көтөр-дайар кынатым,

Көстөр кэрэ биэбэйим –

Майа кыыһа чөл, чүөлбэр,

Майа кыыһа чэп-чэбэр.

Уурбут-туппут уостара,

Умайыктыыр хараҕа

Уранынан уматар,

Умсугутар, угуйар –

Майа кыыһын таптала

Майа кыыһын тускула.

Майа кыыһа мап-маҥан,

Майа кыыһа мап-мааны.

Дьоһун уолан кэргэнэ,

Дьоллоох кэргэн ийэтэ,

Доҕор-атас туһугар

Далбар дарыы кыыс хотун.

Майгы-суобас маанылаах,

Манньыһытар алгыстаах

Майа кыыһа сайаҕас,

Майа кыыһа амарах.

Майа сайына (В. Иванов – Бэрт Хара тыллара, А. Попов мелодията)

Сөрүүн тыал кэлэрэ

Ол киэҥ алаастан

Самыырдаан ааһара

Быстах былыттан.

Майа сайына,

Кэрэ киэһэтэ

Бу миэхэ, эйиэхэ

Күндү буолара.

Умнубат буоларбыт

Биһи Майаны,

Умнубат этибит

Арыы тыабытын.

Хаһан даҕаны,

Хантан даҕаны

Ахтарбыт, саныырбыт

Биһи Майаны.

Сайдар саргылаах бу

Саҥа Майаҕа

Олорор, үлэлиир

Олус үчүгэй.

Сайдар Майабыт,

Саҥа Майабыт,

Эн биһи кэскилбит,

Биһиги төлкөбүт.

Тапталлаах мин Майам (И. Кузьмин тыллара, Е. Гоголев мелодията)

Тапталлаах алааһым – мин Майам,

Баар эбээт сүрэхпэр эн кэрэҥ.

Ийэлээх аҕаккам, бар дьонум

Өбүгэ саҕаттан дойдубут.

Хос ырыата:

Оо, таптыыр мин Майам,

Бу нарын иэйиибин аныыбын.

Күндэлэс эн күөлүҥ күлүмэ,

Эн тулаҥ – чэлгийэр мутукча.

Долгуйа унаарар хонуукаан

Эриэккэс өҥүнэн оонньуура.

Хос ырыата:

Кэрэҕин киэргэтэн, алааһым,

Күн тыган сандаарыа өрүүтүн.

Эн эдэр ыччатын тойугар

Үйэ-саас тухары ылланыаҥ.

Майа вальса (А. Устинова тыллара, Н. Устинов мелодията)

Кэрэ сааскы Майабар мэндиэмэннэр үүнэллэр.

Эдэр эрчим сүрэхтэр туойун үлэ киһитин!

Тутар-айар киһиэхэ, Уруй буоллун эһиэхэ!

Харсар хара харахтар иэйиилэрин айхаллаан,

Дьоллоох олох суолунан иккиэн бииргэ хаамсаллар

Икки сүрэх таптала тохтон-уохтан хаалыма!

Хос ырыата:

Сайда-үүнэ чэчирээ Мэҥэм сирэ, Майабыт!

Ытык Майа (Михаил Скрябин тыллара, Владимир Ксенофонтов мелодията)

Киҥкиниир киэҥ Мэҥэ киининэн,

Ааппытын ааттатар сиринэн,

Үйэҕэ хаалыаҕыҥ эн, Майа,

Мэҥэ таас кэриэтэ кылбайа.

Хос ырыата:

Тапталлаах ытык сир Майабыт

Сарсыҥҥы сайдыыгын туойабыт,

Өбүгэ үгэһин үрдэтэн

Ыллыыбын өрөгөй ырыатын.

Ытыктыыр төрөөбүт түөлбэбит

Манчаары Баһылай саҕаттан,

Олоххо батталы утарсан,

Ииппитиҥ, эрэллээх биһикпит

Хос ырыата.

Дьылҕабыт суолдьута сырдата

Эн элбэх үйэни уҥуордаан,

Иһирэх ийэлии сыдьаайа

Сылаастык кууһаҕын арчылаан.

Хос ырыата.

Төлөннөөх ыччатыҥ удьуора

Эн ааккын ааттата сылдьыаҕа,

Эн чиэскин үрдүктүк тутуоҕа,

Күөнүнэн көмүскүү туруоҕа.

Михаил Скрябин

Ахтар, саныыр Майабыт

Ахтылҕаныан, үөрүүлээҕиэн

Анаан мустар, бары түмсэр.

Күүтүүлээҕиэн, үчүгэйиэн

Күөххэ көрсөр, манна түмсэр.

Бу биһиги Майабыт,

Таптыыр, ахтар Майабыт.

Будул туман бурхачыйдын,

Кырыа кыһын кыыдааннаатын.

Тырым уотун кырпахтара

Кыыһа-сырдыы туруохтара.

Бу биһиги Майабыт,

Таптыыр, ахтар Майабыт.

Биһик намыын ырыатыныы,

Ийэм миэхэ ыллыырыныы

Дойдум-сирим иэтэр-куотар,

Салгын куппун сайа кууһар.

Бу биһиги Майабыт,

Таптыыр, ахтар Майабыт.

Сиргэ төрөөн киһи буолбут,

Дьоҥҥо кыттан дьолу булбут,

Добун айан суолун туппут

Дьоһун-мааны сирбит-уоппут.

Бу биһиги Майабыт,

Таптыыр, ахтар Майабыт.

Сарсын эмиэ сайдар Майа

Саргыланыа саҥа Майа,

Үүнэр ыччат дьолун булуо,

Үөрэ түмсэр сирэ буолуо.

Бу биһиги Майабыт,

Таптыыр, ахтар Майабыт.

Михаил Скрябин

Таптыыр Майам

Бу сиргэ, бар дьоҥҥо тапталы,

Майам эн ааккынан билбитим,

Тапталбар мин үрдүк аатталы

Эн ытык кырдалгар эппитим.

Хос ырыата:

Үөрэххэ, үлэҕэ уһуйбут,

Үрдүккэ, үтүөҕэ көтүппүт

Үөскээбит биһикпит киэҥ Майа,

Эн Майа.

Үүн, үрдээ сылаастык сырайа,

Сыдьаайа.

Кэрэчээн кыыс Майа аатынан

Түҥ былыр бу дойду ааттаммыт,

Ол кыысчаан иһирэх кутунан

Ыччаты илбийэр тыыннаммыт.

Бу сиргэ буулаҕа уоланнар

Буор ылан кыргыһа барбыттар,

Күн сырдык тыыннарын ол дьоннор

Дойдубут туһугар уурбуттар.

Манчаары сиэннэрэ мэҥэлэр

Төрөөбүт түөлбэбит киинигэр

Майаҕа мэҥиһэн кэлэбит,

Махтанар тылбытын этэбит.

Төрөөбүт дойду баар киһиэхэ

Дьылҕа хаан бэрсибэт бэлэҕэ,

Буруолаах барыта дойдулаах,

Бу сиргэ дьоллонор аналлаах

Михаил Скрябин

Майа

Майабыт эн ааккар көрөбүт, сэргиибит

Олохпут хаамыытын, хас биирдии хардыытын,

Эн ааккар истэбит, сэҥээрэ кэпсиибит,

Бар дьонун үөрүүтүн, ынчыгын, ырыатын.

Кыырыктаах кыргыһыы уотугар охтубут

Геройдар ааттарын, өлбөт буор куттарын

Араҥас оҥорон, уһааран-куттаран,

Эн добун тумулгар бигэтик уурдубут...

Баара биир бастакы геройдар кэмнэрэ,

Биэстии сыл былааннаах хаамыытын хардыылаан,

Мэҥэлэр дуо дэтэн, бар дьоннуун бааралаан

Барсыбыт үөрүүлээх өрөгөй күннэрэ.

Киэҥ Мэҥэ киҥкиниир, килбэйэр киининэн,

Эн кэҥээн, тэнийэн, киэркэйэн үүнэ тур!

Кэнэҕэс даҕаны кэхтибэт кэскиллэн,

Үтүмэн үйэни нөҥүөлээн туругур!